تحضير الديول في المنزل: وصفة الديول

 وصفة ديول 

 شوفو اول شيء قبل الوصفة نعطيلكم أسرار نجاح ورق الديول 

1. أولا السميد يكون رطب رطب مفيهاش هدرة

2. ثانيا نوعية السميد مليحة كيما انا اليوم خدمتهم بكنزة رطب

3.ثالثا ديري في بالك بلي الديول أسهل حاجة في الدنيا والحبة الأولى والثانية يفسدو مفيهاش هدرة بصح من بعد يمشيو معاك روعة وكون تصيبي متخلصيش

4. لازم مقلة تيفال أو كرابيار شرط ضروري 

5. لازم العجينة تريح ساعة انا نخليها 30 د برك لكن انتم خليوها ساعة راني نهدر مع المبتدءات لانو هاذا برنامجهم

6. لازم ولازم المقلة ومتسخنش بزاااف تحمى برك فوق النار ومبين كل وحدة ووحدة نحيها 5 ثواني 

7. كل مطيبي وحدة حطيها تبرد فوق فوطة مطبخ وحتى يبردو كامل باش تحطيهم فوق بعضاهم والي تخاف يلسقو تدهن بالزيت دهنة خفييييفة 

8. خلاصو وش مزلتي غير هابطة هيا عري على ذرعيك وطبقي الوصفة يا الفحلة 

جينا الوصفة انا صراحة نستعمل التقليدى تاع السميد وجامي بدلتها ندير 2 كيلات سميد رطب ناكد و3 كيلات ماء و ذرة ملح و مغرفة زيت كبير ة و نخلط بالميكسور 6 أو 7 دقائق ونغطيه ونخليها ترتاح في المطبخ عادي تقدري ديري وصفة كيلة سميد رطب و كيلة فرينةو 3 ما و ملح. المهم الطريقة تطبق على كل الوصفات ضرك نجيوا للطياب نحطو المقلة تسخن ونحيوها 5 ثواني ونبداو نديرو بالبنسو حتى نغطيو المقلة ونزيدو ثاني طبقة باش ميجيوش متقطعين ونرجعها فوق النار حتى وحدها تنصل من المقلة على الأطراف ونحيوها مش راح تأخذ ثواني وهكذا حتى نكمل

ونديروهم في كيس بلاستيكي ونخبيوهم في الثلاجة