قالوا ناس زمان :
ما ينفعك في الضّيق غير ذراعك،
وما يوكّلك الحلو غير صباعك..
لي راح وخلّاك، يجي النهار ويتمناك،
ما تقطع الواد حتى يبانو حجارو،
وما تمشي في الليل حتى يطلع نهارو،
وما تصاحب حدّ حتى تعرف خبارو .
لي أصلو تفاح عمرو ما يتلاح،
ولي أصلو دفلى، عمرو ما يحلى
يالوكان يندار في عسل النحلة.
ما تلعبهاش في الدنيا فاهم،
راه لمخير فيها حيراتو،
كون فيها مظلوم وما تكون ظالم،
غدوة الواحد يبانو ورقاتو ،
مول الخير يروح منها سالم ،
وعمرها في امرو ما خيباتو...
قالو ناس بكري :
إذا راك غارس أغرس النخلة تربح الظل وتأكل من العرجون
وإذا راك كاسب أكسب الرخلة عز ما تأكل والجيب مضمون
وإذا مريض شوف عسل النحلة هو أحسن غذاء ودواء في الكون
وإذا راك خاطب شوفها على أصلها وفحلة في بالك ترتاح ولعرضك تصون .
وإذا مليت اخرج وأعمل رحلة خير ما تعيش ديما مغبون .
البڨرة النطاحة والنعجة الصياحة والمراة النواحة ماتخليهم يدورو في الساحة
والمراة الخبارة والدجاجة الغبارة كسبتهم في الدار خسارة
والسلوڨي إذا نبح والراجل إذا شطح أدي للواد وأذبح
والمكحلة الثقيلة والمراة الهبيلة والضرسة العليلة مافيهم حتى صيلة .
واش قالوا ناس زمان على هذ الزمان:
يولي الخير مشتت
والراي مفركت
والحي يغير من لميت
يولي الخير ياسر
ومول العلم حاصل
ومول المال واصل
يمشي زمان ويجي زمان متخالف
يولي الخو من خوه خايف
هذا محلوف هذا حالف
وكل هذا من قلت الإيمان يالعارف
يقل الإيمان
وتكثر لفتان
وتعلى البنيان
يولي الراجل هايم
والنسا بلا كمايم
مابقالك في دنيا ما تلايم
يولي الشيخ بلا عمامة
ولمرا بلا كمامة
وا رووووووحي ياالدنيا بالسلامة
يكثرو التجار
ويقل لحيا من الصغار
ولمرا ماتشد الدار
تكثر النسا
وتغلا اللبسة
ولقلوب على بعضاها تقسى
يمشي زمان
ويجي زمان معكوس
يسكت الشحرور
وينطق الخنفوس
يولي الوقت مزروب
والغالب يرجع مغلوب
ويكثر البهتان ولكذوب
ولحق يولي على وجهه مكبوب
جيل يعيش بالسيف
وجيل يعيش باللهيف
وجيل منو ياحفيظ ويالطيف
الحاصول الله لا يورينا هاد الجيل.
وصاتني حنانة و قاتلي :
يا بني قرب عندي وحط يدك بيدي
واسمع لردي وافهم للكلام مش غير تدي
قلتلها قولي وليك مني محبتي وودي
قالت: المحبه تتعطى وما تتشرى بالمال
والدار تزينها المرا الناشطة وكثرة العيال
واصبر من تبدال الحال
اللي حبك أعطيه قدرو في الحال
وكون لمحبتو كيال
واذا صحبت اصحب الرجال الي مايهابو طلوع الجبال، ولا كلمتهم تبدال
واللي كرهك فارقو لا تكثر السوال
يا بني المحبه ياك هي القدر
اللي كرهك ما حفرلك قبر
واللي حبك ما بنالك قصر
يابني نوصيك ما تكون ذليل
وعدوك ومحبوبك ما يشوفك عليل
ذيك الساعة تولي في عينيه قليل
وماتحط وذنك للقال والقيل..
ناس بكري قالو
خوذ بنت الاصول لعلة الزمان يطول
عز الطفلة مع بوها ومن غير بوها تتهان حتى لو كان شيخ القبيلة خوها ...ورجلها ولد السلطان
طفلة تسرح بالغنم حفيانة ولا طفلة تشطح بين الرجال عريانة
تروح ناس وجي ناس وتبقى رضاية الوالدين تاج فوق الراس
نمشي نمشي واذا عييت نرتاح المكتوب عليا يجي ولوكان نطير بلا جناح
اللي باعك بالفول بيعو بقشورو واللي نكر لخير ما تقيمو بدورو
الي نساك انساه لا تخمم فيه خليه للعالي يتكفل بيه
فمي مغلوق وقلبي صندوق وربي من لفوق يخلص لحقوق
اقعد بعيد واتفرج فيهم تعرف علاه ربي بعدك عليهم