العجين المورق (يمكنك شراءه جاهز او تحضيره بنفسك)
العجينة المورق لكل كيلو دقيق (فرينة)-(اربع معالق خل ست معالق زيت ملعقة صغيرة ملح تجمعي بماء بارد شوي)
اتركيها تستريح عشر دقايق وتفتحيها بالطول وطبقيها على ثلاثة وعاودي افتحيها وابرشي(حكي) عليها زبدة توريق 500غ وروليها كما كيك رولي او طبقيها على ثلاثة بالعرض ثم ثلاثة بالطول وعاودي اطرحي العجينة سمك رقيق وعاودي طبقيها على ثلاث طول وثلاثة عرض وهي جاهزة
استعيني بالدقيق في الدلك تسهل عليك بزااف
اتركيها ترتاح شوية ووجدي الكريم باتسيير تقدري ديري اي وحدة مجربة او معتمدة عندك ونجحتلك ولي تحب وحدة اقتصادية
نص لتر ماء او حليب اربع معالق سكر اربع معالق نشاء خلطي بارد في بارد وحطيها على النار تغلي وطفي واضيفي ملعقة فانيلا وملعقة زبدة وحركي وفرغيها في صحن وغطيها بنيلو(بلاستيك غدائي) وخليها تبرد في راحتها
ارجعي للعجين اقسميها على زوج اطرحي النصف بسمك رقيق وثقبيه بالشوكة كله وحطيه على صينية فرن فيها ورق طهي او مرشوشة بالدقيق وزيدي غطيه بورق طهي وحطي عليه صينية اخرى فارغة وتكون شوي ثقيلة لكي ما يفسدلكش شكل الملفاي ودخليه للفرن يطيب كي تشوفيه تحمر كله خرجيه وزيدي النص الاخر من العجينة اذا حبيتي ديري ملفاي بزاف ... خليه يبرد وقطعيه على ثلاثة بالتساوي
جيب الكريم باتسيير بعد ما بردت ولصقي بها طبقات الملفاي
الفوندو او الطلية 2 كاس سكر رطب (بودرة)(الكمية تبقى على حسب حجم الملفاي ) وحطي فيه شوي حليب حطي بالملعقة وادهني بسرعة حتى تتحصلي على فوندو ديريه شوي ناشف اكتفي بثلاث مغارف حليب وزيني بيه الملفاي من فوق وشوي ديرليو كاكاو واعملي بيه الخطوط ...اتمنى تكون الطريقة مفهومة
وبصحه وراحة
إرسال تعليق