كيفاش تديرو عجينة ميني تارتولات بعجينة الصابلي و تخرجلكم ناجحة
* * يجب احترام المقادير :
◾عجينة الصابلي عندها مقادير مضبوطة :
1)- الزبدة :
*يعني اذا درتي 250 غ زبدة تحتاج :125 غ سكر و 500 غ فرينة
- إذا درتي الكيلة لي فيها : 500 غ زبدة ، تحتاج : 250غ سكر و 1 كغ فرينة
■ملاحظة : ممكن تزيدي و لا تنقصي شوية الفرينة على حساب واش تاكلك العجينة بصح هذا هو المبدأ تاع الصابلي
----------------------------------------------------------------------
2)- البيض🥚...صفار البيض يهشش العجينة و البياض ييبسها ....
*يعني 250 غ مرغرين لازملها 2 حبات بيض... أنت في عوض أديري 2 حبات كاملين... ديري 2 صفار و حبة كاملة...
*و اذا درتي 500 غ مرغرين لازملها 3 صفار و حبة كاملة .
----------------------------------------------------------------------
3)- المايزينة(النشااء).... يعني اذا حبيتي عجينة الصابلي تاعك يجي يقرمش شوية ديري الفرينة وحدها و اذا حبيتيها تجي مرملة كيما الغريبية زيديلها مايزينة...هاذي مسالة ذوق
----------------------------------------------------------------------
4)- الزيت:
حبيبتي اذا زدتي شوية زيت رح يجيك الصابلي محمر، بحيث:
*الكيلة تاع 500 غ زبدة ضيفي في العجينة 5م ك زيت.
*الكيلة تاع 250 غ زبدة ضيفي في العجينة 2 مغارف كبار زيت.
----------------------------------------------------------------------
5)- السكر.. حبيبتي استعملي السكر الرطب ڨلاصي أحسن وافضل، لأن السكر العادي يبس العجينة.
----------------------------------------------------------------------
6)- الخميرة الكيميائية:
تقدري ديري رشة فقط كيما تقدري تستغناي عليها أنا شخثيا نستغنى عليها في تارتولات.
----------------------------------------------------------------------
7)- حبيبتي لما تلمي العجينة ما تعجنيهاش لميها برك.و لازم تخليها طرية ...هذا ثاني مبدا في القاطو... عجينة تلميها طرية مي تطيب تجيك طرية و اذا لميتيها يابسة أكيد في الفور تيبس أكثر ...علي هاذي قلتلك في الصابلي ديما كيلي الفرينة تكون دوبل كمية ليدام سيريها مليح و حطيها قدامك باش ما تفوتيش هاذ الكمية
----------------------------------------------------------------------
8)- لما تلمي العجينة مذابيك غلفيها بسيلوفان و ترتاح في الفريجيدار من 15-30 دقيقة تجيك ساهلة ورطبة.
* لما تجي تحطيها في المول بللي يدك بالزيت وكوريها رطبيها وحطيها فيه ساويها على كامل المول و ثقبيها بشوكة.
----------------------------------------------------------------------
9)- طريقة الطهي :
*سخني الفرن مقبل و اشعليه من الأسفل فقط دخلي الصينية لما تشوفيهم خذاو اللون الذهبي في الأطراف نحيهم *مدة الطهي لاا تتعدى 20 د حسب الفرن .
----------------------------------------------------------------------
■الوصفة المعتمدة و المضبوطة هي كالتالي :
( 250غ زبدة+سكر رطب 125غ + 2 صفار بيض وبيضة كاملة+ نصف كاس مايزينة+ 2 م ك زيت+ الخميرة قادر ديري رشة أو تستغناي عليها ونلم بالفرينة..(500 غ أو أقل ) حسب النوعية. دعوة خير فقط ❤❤
إرسال تعليق