موسكوتشو بالكريمة
المقادير
4حبات بيض
كاس غير ربع زيت
كاس حليب
كاس ونص سكر
مغرف كبيرة فانيليا
مغرف صغيرة بيكاربونات
3مغارف صغار خميرة الكيميائية (حلوة)
2كيسان ونص فرينة
2مغارف كبار كاكاو
2مغارف صغار قرفة
الكريمة
في غيسيبيو نحط 6قطع جبن ابيض ناقص ملح نزيد معاه نص علبة حليب المحلى مركز فانيليا اوكراميل ونخلط مليح بالفوي اليداوي ونزيدلهم كاس ڨشدة سائلة ونخلط بالفوي وبعد نطلعهم بالباتور الكهرابائي مليح حتى تشد روحها ويتضاعف الحجم لكريمة ندخلها لثلاجة تشد روحها
طريقة التحضير
في غيسيبيو نحط 4حبات بيض وكاس ونص سكر ومغرف كبيرة فانيليا ونطلعهم مليح بالباتور حتى يتغير اللون نزيد كاس غير ربع زيت ونكمل الخلط بالباتور نزيد كاس حليب غير بالعقل وفي نفس الوقت نخلط بالباتور ونزيد نخلط في صحن 2كيسان ونص فرينة و3مغارف صغار خميرة الكيميائية ومغرف صغيرة بيكاربونات ونصفيهم فوق الخليط البيض ونخلط مليح بالفوي اليداوي حتى تتحل الفرينة ونقص 16مغرف او كمية من الخليط في صحن ونخلط معها 2مغارف كبار كاكاو و2مغارف صغار قرفة ونخلطهم مليح
ونأخد مول خاص بالموسكوتشو مذهون بالزبدة ونفرغ كمية من الخليط أبيض ونزيد شوي من الخليط الكاكاو ونزيد من الخليط أبيض ونزيد من الخليط كاكاو حتى نكمل كامل الخليط أبيض وكاكاو وندخلها للفرن على درجة الحرارة 180°حتى تأخد اللون الذهبي نخرجها تبرد ونحيها من القالب ونغلفها بالكريمة مليح ونزيد نديرلها خطوط بالشوكولا الطلي في لابوش ونزينها بالجوز ونخليها تبرد وتشد روحها نخرجها ونقطعها وتقدم شهية طيبة للجميع
إرسال تعليق